El pozu Fondón inaugura una instalación qu'hibrida xeotermia d'agua de mina y biomasa

Hunosa yá cunta con otru district heating nel Pozu Barredo

El District Heating de Fondón, en Llangréu, inauguró esti vienres la segunda fase d'esta instalación pionera n’Europa por ser la primer rede de calor qu'hibrida la xeotermia d'agua de mina con biomasa, y amenorga más de 1.300 tonelaes d'emisiones de CO2 al añu.

La culminación de la segunda fase de la rede de calor dexó estender el serviciu a otres cinco edificaciones, ameyorando la so eficiencia y amenorgando la dependencia del bombéu al traviés d'una solución, desenvuelta por Grupu Hunosa, "altamente anovadora" n'Europa.

El presidente de la sociedá estatal, Enrique Fernández, asistió esti vienres a la inauguración de la segunda fase d'una actuación que cuntó col sofitu financieru de la Xunión Europea al traviés de los fondos Feder.