Los sindicatos d'Arcelor amuesen la so esmolición pola parada na producción d'alambrón

Reclamen a la Xunión Europea aranceles que frenen les importaciones

Cuasi 500 trabayadores tán afectaos poles paraes d’ArcelorMittal. Güei ye'l segundu día que se dexó de producir alambrón y dende’l llunes tamién lo fadrá la planta d'aceru.

Los sindicatos son críticos cola decisión de la multinacional siderúrxica de parar la producción d’alambrón 10 díes. La empresa asegura que l'axuste ye pola falta de pidíos y que tán obligaos a parar.

Dende Comisiones Obreres llamenten la decisión y aseguren que se toma p'aforrar un 30% los costos fixos y consideren a ArcelorMittal cómpliz de la llegada de productos de fuera de la XE, señala José Manuel Castro, secretariu xeneral de CCOO n’ArcelorMittal Asturies. Dende UXT reclamen aranceles y marcu enerxéticu estable.

ArcelorMittal afirma qu'Europa ye incapaz de frenar les importaciones, y xustifica asina tamién la parada de l'acería dende'l llunes que se suma a la del tren d’alambrón, esplica Alberto Carrero, director de Sostenibilidá y Comunicación d’ArcelorMittal n'España.

La multinacional sigue ensin decidir el so futuru n'Asturies y entá nun presentó'l proyectu pa caltener los 450 millones d'euros pal procesu de descarbonización na planta DRI, d'amenorgamientu de mineral de fierro. Ye la mayor ayuda a una empresa na hestoria d'España.