Los Perte del agua detectarán fugues y meyorarán el so control nel 70% de la rede asturiana

Los tres proyectos presentaos a alcaldes y técnicos recibieron 25 millones de fondos europeos

La dixitalización del ciclu del agua meyorará la eficiencia del suministru y la seguridá de les infraestructures nos años vinientes. Güei presentáronse a alcaldes y técnicos los tres proyectos que recibieron 25 millones de fondos europeos.

El 70% de les infraestructures d’abastecimientu y depuración del agua qu’hai n’Asturies tendrán, nun plazu de dos años, un sistema de dixitalización qu’apurrirá datos a tiempu real de les pérdides y el consumu que lleva alantre la población, lo que dexará identificar problemes y priorizar inversiones nes conducciones o depósitos que presenten mayores pérdides.

Anque l’oxetivu ye llegar al 100%, los Perte (proyectos estratéxicos pa la recuperación y tresformación económica) de Dixitalización del Ciclu del Agua aprobaos p’Asturies dexarán actuar sobre’l consumu que lleva alantre’l 70% de la población en más d’una ventena de ayuntamientos y tendrán que tar remataos a finales de 2026.

En total, supondrán una inversión d’unos 35 millones d’euros de los que 25 millones sedrán apurríos polos Perte y el restu pola Conseyería de Transición Ecolóxica, el consorciu d’agua del Principáu (Cadasa) y los ayuntamientos implicaos.

Estes cifres fueron presentaes nuna xornada dedicada a la dixitalización del ciclu del agua n’Asturies que cuntó cola presencia del secretariu d’Estáu de Mediu Ambiente, Hugo Morán, y la conseyera de Transición Ecolóxica, Nieves Roqueñí.