FADE pide fiscalidá más competitiva pa fomentar la inversión y l'empléu n'Asturies

María Calvo axunta col conseyeru de Facienda

La presidenta de FADE, María Calvo, destacó esti xueves la necesidá urxente d'avanzar hacia una fiscalidá "más competitiva" pa fomentar la inversión y l'empléu n'Asturies que dexe a la rexón competir n'igualdá de condiciones con otros territorios.

Asina lo declaró tres la xunta caltenida col conseyeru de Facienda, Guillermo Peláez.

Pa Calvo la fiscalidá ye un factor “cimeru" na localización d'empreses y patrimonios, polo que refugó quedar "atrás" mientres qu'otros territorios "adapten el so marcu fiscal p'atraer inversión y talentu".

Ente les propuestes presentaes pola patronal destaquen l'aumentu a 300.000 euros de la tarifa superreducida (del 2%) en donaciones, pa facilitar la tresmisión de patrimoniu ente familiares cercanos ensin una penalización fiscal escesiva; actualizar el mínimu exentu en materia de sucesiones, y ameyorar la tributación de la empresa familiar.

Otres iniciatives céntrense n'establecer un amenorgamientu autonómicu específicu del 99% nos impuestos de sucesiones y donaciones pa empreses familiares, igualándose con otres comunidaes autónomes que yá adoptaron midíes similares, y fomentar la inversión empresarial con deducciones fiscales na compra d'acciones o participaciones n'entidaes de nueva creación o ampliación de capital.

Una fiscalidá más competitiva "non solo sedría más xusta frente a otros territorios, sinón que xeneraría más actividá económica y, polo tanto, una mayor recaldación", defendió Calvo, que ve la hora de "aumentar les bases imponibles, non los tipos impositivos" pa recaldar meyor.