L'alcaldesa de Ponga defende les sos actuaciones en Sobrefoz

Marta Alonso asegura que nesti casu quier ganase nel xulgáu lo que nun s'algamó nes urnes

L’alcaldesa de Ponga declaró nel xulgáu de Cangues d’Onís. Fízolo dientro de la querella interpuesta escontra ella pola parroquia de Sobrefoz en mayu de 2023 por prevaricación y falsedá documental.

Marta Alonso compareció de forma voluntaria acompañada pola so pareya, l’alcalde de Llanera, Gerardo Sanz, que llevaba una maleta con documentos que, a xuiciu de so, prueben la so versión. A la rexidora notificóse-y la denuncia n’avientu de 2023, anque ensin axuntar nengún tipu de documentación que la afite.

Marta Alonso asegura que nesti casu quier ganase nel xulgáu lo que nun s’algamó nes urnes. Recuerda qu’en nueve años como alcaldesa presentáronse escontra ella un centenar de demandes.