Les floristeríes mengüen les sos ventes en Difuntos

El puntu cimeru d'encargos espérase pa la selmana viniente

Nes floristeríes tán yá en plena campaña de difuntos, una de les más importantes del añu pal sector, anque afirmen que les ventes nestes feches menguaron nos últimos años.

Avérase’l día de Difuntos y les floristeríes yá entamen a recibir los primeros encargos, anque’l puntu cimeru de pidíos espérase pa la selmana viniente.

Anque los Difuntos siguen siendo una fecha clave pal sector, dende les floristeríes afirmen qu’añu a añu nótase que la tradición de visitar los cementerios el día 1 de payares y honrar a los que yá nun tán con flores, ta perdiéndose.

Anque aún son munches les persones que s’averen tolos años p’adornar y pintar les tumbes de los sos seres queríos nestes feches.

Los floristes piensen que la campaña de Difuntos allargaráse esti añu hasta’l 3 de payares.