Los vecinos de Riosa, Morcín y Mieres xúnense pa reclamar una conexón peatonal ente los tres conceyos

Proponen reabrir como sienda peatonal el trazáu del antiguu ferrocarril mineru ente La Foz y Lloreo

Con una marcha a pie los vecinos de Riosa, Morcín y Mieres xunen les sos fuerces pa recuperar la conexón peatonal ente los tres conceyos. L'apertura de la cantera de Peñamiel partió en dos la sienda que percuerre'l trazáu del antiguu ferrocarril que daba serviciu a mines de Riosa.

L'entamu de l'actividá estractiva cerró al pasu'l quintu de los 11 túneles del percorríu, dientro'l perímetru de la cantera.

Los vecinos argumenten que pese a que la so concesión nun acaba hasta 2029, la esplotación lleva 12 años inactiva.

Una sienda que, defenden, sedría un aliciente pa la zona. El pidimientu vecinal cuenta col sofitu de los alcaldes de los tres conceyos y una trentena d'entidaes de la zona.

La so propuesta va ser treslladada al Principáu pa tratar d'algamar un puntu d'alcuerdu.