Prindáu un uvieín con 37 kilos de mariguana cultivada nuna plantación de Llanera

La plantación, de 400 metros, taba oculta ente vexetación y matos

La Guardia Civil d’Asturies prindó esti martes a un vecín d’Uviéu de 40 años como presuntu autor d’un delitu escontra la salú pública pol cultivu d’una plantación de 400 metros cuadraos de mariguana nuna zona rural apartada del conceyu de Llanera, asina como pola posesión de 37 kilogramos de cogollos de cannabis yá collechaos.

Según informa la Guardia Civil, la investigación entamó en mayu cuando los axentes tuvieron constancia de la existencia d’una plantación medrante de plantes de mariguana nun tarrén de 400 metros cuadraos aproximadamente, ocultu ente vexetación y matos d’unos dos metros d’altura que torgaben la so visualización.

Nos cuatro meses que duró la investigación, fízose un siguimientu na evolución de la medría de la droga, asina como del so cuidador, faciendo falta la fechura de delles vixilancies de siguío de manera discreta pa nun llevantar les sos sospeches.