Rematada la investigación interna sobre l'incendiu de la planta de Coxersa

El Principáu piensa que'l seguru de responsabilidá civil xubirá a 800.000 euros

La investigación interna que’l Consorciu pa la Xestión de Residuos Sólidos d’Asturies (Coxersa) llevó alantre p’afitar por qué la planta de reciclaxe prendida n’abril nun tenía seguru d’estrozos materiales, al igual que’l restu de les instalaciones del vertederu de Serín, conoceráse mañana, según informó esti martes la conseyera de Transición Ecolóxica, Nieves Roqueñí.

Güei convocóse una xunta estraordinaria del Conseyu d’Alministración de Coxersa, que tendrá llugar mañana pela tarde, "pa informar del resultáu de la investigación fecha pola xerente, Paz Orviz, y ver los siguientes pasos a dar", señaló la conseyera al responder nel plenu de la Xunta Xeneral del Principáu a una entruga fecha pol diputáu del PP Rafael Alonso.

Roqueñí dio instrucciones a mediaos d’esti mes a la xerente de Coxersa, pa que xestionare personalmente la contratación d’una póliza de seguru d’estrozos materiales, col envís de tener robláu’l contratu nel primer trimestre de 2025, y pa que se faga una "investigación interna" p’afitar la causa pola que se tardó tanto en contratar esi seguru.

"La xerente dispón de tola información, non con fines acusatorios o esculpatorios, y toi convencida de que l’informe valdrá pa meyorar", afirmó la titular de Transición Ecolóxica, pa la que lo importante ye algamar que Coxersa funcione cada vegada meyor, dea un serviciu de mayor calidá, medre’l reciclaxe y mengüe’l costu y la tasa que paguen los ayuntamientos.

El Xulgáu d’Instrucción númberu 4 de Xixón reabrió va tres selmanes les dilixencies d’investigación sobre l’incendiu rexistráu’l mes d’abril pasáu na planta de tratamientu de la fracción restu del vertederu de Serín p’afitar si hubo irregularidaes d’algame penal.

El Principáu piensa que’l seguru de responsabilidá civil xubirá a 800.000 euros

La contratación d’un seguru de responsabilidá civil pola alministración del Principáu tendrá un costu estimáu de 800.000 euros, 200.000 más de lo consignao nos presupuestos autonómicos d’esti añu, según avanzó la vicepresidenta del Gobiernu, Gimena Llamedo, qu’aseguró que la so llicitación tendrá llugar "bien llueu".

"Los pliegos tán llistos y la garantía que puedo dar ye que bien llueu saldrá la llicitación", solliñó la vicepresidenta enantes de señalar qu’afitar cuál ye un preciu xustu por un seguru de responsabilidá "ye un llabor difícil".

En rempuesta a la entruga que sobre esti asuntu plantegó esti martes nel plenu de la Xunta Xeneral del Principáu’l diputáu popular José Agustín Cuervas-Mons, la vicepresidenta y conseyera de Presidencia señaló que la tramitación ta activada, que yá s’asoleyó l’anunciu de la llicitación nel diariu de sesiones de la Xunión Europea esti mes y que la llicitación llevaráse alantre bien llueu.