El presupuestu del Principáu pa 2025 va xubir a 6.350 millones, dos más qu'en 2024

Unes cifres "mui asemeyaes" a les cuentes aprobaes p'anguaño

El proyectu de presupuestos del Principáu pa 2025 va xubir a 6.350 millones d'euros, unes cifres "mui similares" a les cuentes aprobaes p'anguaño y que xubieron a los 6.348 millones, avanzó esti martes el conseyeru de Facienda, Guillermo Peláez.

El voceru del Executivu asturianu anunció les principales cifres de los presupuestos autonómicos tres acabar la primer ronda de xuntes colos grupos d'oposición, na que'l Gobiernu, encabezáu pol so presidente, Adrián Barbón, caltuvo alcuentros col PP, Foro y la diputada del grupu mistu Covadonga Tomé.

Les cuentes del 2025 van cuntar con 242 millones d'euros menos de la lliquidación del modelu de financiamientu autonómicu de 2022, alredor de 100 millones menos del Mecanismu de Recuperación y Resiliencia y 60 millones que'l Principáu nun rercibiría si nun s'aprueba'l techu de déficit propuestu pol Gobiernu.

Sicasí, Peláez esplicó que la meyora de l'actividá económica y la creación d'empléu nel Principáu tien una repercusión nos ingresos de l'alministración autonómica.

El conseyeru de Facienda señaló que, nel conceutu d'entregues a cuenta, Asturies va recibir en 2025 un total de 3.733 millones d'euros, lo que significa una medría d'un 8,58 por cientu.