El plenu de Xixón aprueba un presupuestu de 303,5 millones d'euros pa 2025

La oposición considera les cuentes propagandístiques

El plenu del Conceyu de Xixón aprobó esti xueves los presupuestos municipales pa 2025, que xuben a 303,5 millones d'euros, frente a los 300,6 millones del presente exerciciu (un 0,99 por cientu más).

Los presupuestos consolidaos, esto ye, teniendo en cuenta tamién les partíes de los organismos autónomos y les empreses municipales, algamen los 413,7 millones.

Na sesión plenaria nun s'aprobaron nenguna de les 53 enmiendes defendíes por parte de los grupos de la oposición.

La conceyala de Facienda, María Mitre, señaló que n'avientu de 2023 aprobáronse unos “presupuestos rexeneradores", como la base d'un Xixón con "ambición de futuru", tres atopase con un Conceyu "caóticu dafechu" y con "númberos que nun cuadraben".

Resaltó que, un añu dempués, llográronse "resultancies", porque "la política improvisa, los númberos non" y, nesti sen, indicó que los de 2025 son unos presupuestos "de despegue, que reflexen un Xixón líder".

Nun duldó en calificar estes partíes como "les más importantes de la última década", con cantidaes destinaes a proyectos como la “rexeneración del oeste", el desenvolvimientu de "Naval Azul", l'ampliación del Parque Científicu y el centru de Tabacalera, ente otros.

Mitre afitó que'l Conceyu llogró un amenorgamientu de los gastos financieros, qu'agora se puen destinar a inversión, polo que celebró l'aprobación d'unos presupuestos “realistes, modernos y de futuru".

La vicealcaldesa, conceyala d'Economía, Empléu, Turismu y Innovación y vocera municipal del PP, Ángela Pumariega, esplicó que los presupuestos de 2025 dan "respuesta a les necesidaes de los xixoneses" y, nesti sen, calificó les partíes de la so conceyalía como un auténticu "motor" pa "construyir el Xixón del futuru".

Pumariega punxo en valir proyectos como l'ampliación del Parque Científicu Tecnolóxicu y Naval Azul, al empar que remarcó que se consiguió comprometer tolo alcordao nel Pactu de Concertación Social.

Pela so parte, el voceru del Gobiernu municipal y de Foro, Jesús Martínez Salvador, calificó les partíes pal próximu exerciciu como la ferramienta que va dexar cumplir los “oxetivos marcaos" y apuntó que "nun esiste precedente" d'aprobar unes cuentes con "tanta antelación".

El conceyal tamién s'amosó satisfechu de que'l proyectu presupuestariu seya una realidá "ensin xubir los impuestos a los ciudadanos".

El presidente de Divertia y conceyal non adscritu, Oliver Suárez, apuntó que’l de 2025 ye un presupuestu “estratéxicu" y el "más importante de la última década".