Los tarrenes lliberaos poles bateríes de coque n'Avilés entamarán a comercializase nun mes

El Principáu promueve un nuevu programa de suelu industrial con una ventana única

La cercanía al cai, l’ecosistema industrial del entornu y el desendolcu n’I+D+I, son aspectos que faen especialmente atractivos los tarrenes de les bateríes de coque. Asina lo reconocieron güei los espertos que se dieron cita nel Congresu Nacional d’Árees Empresariales que se ta desendolcando n’Avilés.

Un alcuentru nel que se volvió a reconocer lo llaborioso que ta siendo’l procesu de descontaminación y recalificación de los tarrenes.

L’ampliación de la marxe derecha de la ría, xustifica les nueves actividaes empresariales que se tán desendolcando nes antigües instalaciones d’Ensidesa, según Santiago Rodríguez Vega, presidente de l’Autoridá Portuaria d’Avilés, qu’afirmó que tamién sedrá un elementu diferencial a la hora de comercializar los suelos de bateríes de coque.

Sepiddes, propietaria de los tarrenes de l’antigua Ensidesa n’Avilés, foi la encargada de l’esbarrumbe y recuperación definitiva d’esti espaciu, del que resultarán más de 200.000 m² de suelu d’usu principalmente industrial y loxísticu.

El so presidente, Francisco Blanco, afirma que l’actual etapa de descontaminación y recalificación ye una de les más complicaes. La previsión ye que n’avientu puean rexistrase les parceles pa entamar cola venta, destaca l’alcaldesa d’Avilés, Mariví Monteserín.

Nos últimos 20 años, el Principáu invirtió más de 200 millones d’euros en desendolcar espacios empresariales y industriales. Anguaño trabaya nun nuevu programa de suelu industrial que se desendolcará hasta 2027. Inxerta agospiar una ventana única pa poner suelu a disposición de los inversores, anunció la conseyera de Transición Ecolóxica, Industria y Desendolcu Económicu, Nieves Roqueñí.

Según los espertos, el puntu fuerte de los tarrenes de les bateríes de coque, ta na cercanía al cai, l’ecosistema industrial, la formación qu’hai na fastera y el desendolcu n’I+D+I.