La Universidá d'Uviéu recibe'l premiu Trelce Roses d'Asturies pol so llabor d'investigación, estudiu y espardimientu de la cultura democrática

Villaverde destaca'l compromisu de la Universidá pa caltener la memoria histórica

La Universidá d'Uviéu recibió esti sábadu'l XIV Premio Trelce Roses, una reconocencia que reflexa'l “compromisu firme" de la institución docente pa caltener y recuperar una memoria histórica necesaria pa tener una "sociedá digna".

Asina lo aseguró'l rector de la Universidá, Ignacio Villaverde, quien sorrayó que "ensin memoria nun hai dignidá" y llamentó qu'haya quien emplegue esti asuntu como un "arma que se tira a los demás".

Nesti sen, dixo que se trata d'una “reconocencia al esfuerzu" de tola comunidá educativa de "reconocer a eses persones que sufrieron y a eses families que siguen sufriendo frutu d'años escuros y que tantes feríes dexaron".