Trabayos seguros pa despeyar bien llueu la vía na que se produxo l'argayu

PP y Foro piden un mapa d'argayos y Tomé, del grupu mistu, la supresión del peaxe d'El Güerna

La delegada del Gobiernu n’Asturies, Adriana Lastra, señaló que "de mano" nun hai vehículos atrapaos sol argayu escomanáu d’El Güerna qu’obligó esti domingu al corte total de l’AP-66, principal vía de comunicación ente’l Principáu y La Meseta.

"Paez ser que la bona noticia ye que nun hai persones soterraes, pero too esto tamos diciéndolo con della prevención, pero, de mano, paez que ye asina", comentó nuna visita a la zona onde tuvo llugar l’argayu de tierra y piedra que foi al rodiu de les 10:15 hores y qu’afectó a les cuatro carriles de la vía.

En declaraciones a los periodistes, Lastra destacó que dempués de que l’operativu esplegáu pola Guardia Civil, los Bomberos d’Asturies y la propia empresa concesionaria de la vía, Aucalsa, ficiere llabores de verificación nel tarrén, "creemos que nun hai naide y nengún vehículu soterráu".