Asturies ye una de les comunidaes que más notificaciones unvia por reacciones contraries a los medicamentos

Uviéu acueye unes xornaes por mor del 40 aniversariu del Sistema Español de Farmacovixilancia

L’añu pasáu’l Sistema Español de Farmacovixilancia recibió 42.300 notificaciones de reacciones contraries a medicamentos, les más unviaes por profesionales sanitarios y sobre manera leves, por trestornos del sistema nerviosu o dixestivu. Una cifra que vuelve a la recoyida na prepandemia porque en 2021 y 2022 multiplicóse por dos, sobre manera d’avisu por reacciones a les vacunes del COVID-19.

Asturies ye una de les comunidaes que más notificaciones por reacciones contraries unvia al Sistema de Farmacovixilancia español, unos 2.000 casos al añu.

Toos estos datos analícense nunes xornaes n’Uviéu que coinciden col 40 aniversariu del Sistema de Farmacovixilancia que, nestes cuatro décades, recoyó cerca de 600.000 casos de sospeches de reacciones contraries a medicamentos y vacunes.