L'alumnáu asturiano, a la cabeza en competencia dixital xunto a catalán y madrilano

Los estudiantes españoles algamen meyores resultaos que la media de la Xunión Europea

L’alumnáu catalán, madrilano y asturiano tán a la cabeza del país nel rendimientu de competencies dixitales según un estudiu qu’asitia al alumnáu español penriba de la media de la Xunión Europea nesta materia, anque la diferencia ente estudiantes con niveles socioeconómicos altos y baxos ye significativa y hai una fendidura d’hasta 69 puntos.

D’esta forma recuéyelo l’Estudiu Internacional sobre Competencia Dixital (ICILS) 2023 asoleyáu esti martes pola Asociación Internacional pa la Evaluación del Rendimientu Educativu, na que participa’l Ministeriu d’Educación, Formación Profesional y Deportes per primer vegada.

Según esti informe que mide la preparación y capacidá del alumnáu de segundu de la ESO pa usar los ordenadores y les tecnoloxíes, los estudiantes españoles d’esti cursu amuesen un rendimientu mediu altu (495 puntos sobre 600), 3 puntos penriba de la media europea y con un resultáu asemeyáu al d’Italia (491 puntos), Francia (498) o Alemaña (502).

Diferencies socioeconómiques y por xéneru

L’estudiu amuesa una gran diferencia ente’l rendimientu que tien l’alumnáu con estatus económicos y culturales diferentes, y inclusive si son estudiantes nativos o inmigrantes, y tamién por sexu.

La fendidura ente alumnáu favorecío y desfavorecío llega a los 69 puntos y ente nativos o inmigrantes ye de 28 puntos.

Tamién hai diferencia por xéneru, destacando un meyor usu de les tecnoloxíes y de competencia dixital nes moces, con una fendidura de 19 puntos al respective de los mozos, mayor entá que la de la media europea.

Cataluña, Madrid y Asturies a la cabeza

El rendimientu de competencies dixitales ye mayor nel alumnáu de segundu de la ESO de Cataluña, Madrid, Asturies, Castiella y Lleón, La Rioja, Les Canaries y Cantabria, onde’l porcentaxe d’estudiantes que tien un nivel mediu altu supera al del nivel baxu.