Los tresportistes denuncien que l'aparcaderu de Vil.layana nun ta bien acondicionáu

Na esplanada nun ta conectada la lluz y fizo falta instalar un xenerador

El pieslle a la circulación de camiones pela tarde y la nueche d’esti martes per El Puertu Payares obligó a abrir d’urxencia l’aparcaderu d’emerxencia pa camiones que se construyó en Vil.layana, en L.lena, onde entá nun ta conectada la lluz y fizo falta instalar un xenerador.

Unos topes ensin pintar son una de les quexes de los primeros tresportistes que pasaron la nueche nel nuevu aparcaderu d’emerxencia ivernal, denuncien Francisco Vega o Antonio Casares.

Unos 30 camiones durmieron na esplanada. La primer ñeve sobre Payares provocó la prohibición de circular a vehículos pesaos dende les 19:00 d’esti martes.

El Ministeriu de Tresportes construyó l’aparcaderu va poco. Entá se ta trabayando na acometida de la lluz, asina que fizo falta instalar un xenerador pa los primeros usuarios, pero hai otres demandes.

L’aparcaderu tien una superficie de 46.000 metros cuadraos y tien capacidá pa 375 camiones. La so finalidá ye acoyer a los vehículos cuando les condiciones de la carretera nun los dexe circular pa La Meseta, como pasó esta vegada.