El PP cuestiona la voluntá del gobiernu pa negociar los presupuestos rexonales

Andrés Ruiz afeó a Barbón la so incapacidá pa llegar a grandes alcuerdos

El Partido Popular tien claro que'l presidente del Principáu, Adrián Barbón, nun tien intención de negociar con esta formación los presupuestos autonómicos del próximu añu y qu'optó poles minoríes envede apuntar les cuentes rexonales "pa la gran mayoría social d'Asturies".

Según el voceru de Facienda del PP na Xunta Xeneral del Principáu, Andrés Ruiz, asina se vio cuando'l xefe del Executivu autonómicu pidió al presidente de los populares asturianos, Álvaro Queipo, que s'abstuviera na votación de los presupuestos, lo que supón una "renuncia a toa ambición negociadora".

"Barbón nun tien intención dalguna d’entablar negociación dalguna col PP", sorrayó'l diputáu popular nuna rueda de prensa na qu'aseguró que "la soberbia de Barbón fai imposible los grandes alcuerdos y dexa al so Gobiernu cada vez más pequeñu y dependiente de les minoríes que la sofiten".

Ruiz, qu'aclarió que'l PP va siguir diendo a les xuntes a les que los convoquen "por llealtá institucional", criticó que dende'l Gobiernu nun-yos dieren nengunu de los datos que pidiera sobre recaldación prevista d'impuestos o del gastu corriente y que se llendara a treslladar la so negativa a reformar nengún impuestu.

Tampoco respondió "con claridá" a les tres exes que'l PP treslladó al Gobiernu p’abordar la negociación presupuestaria: una fiscalidá que sollivie la carga tributaria, una alministración más eficiente y más eficaz y el blindaxe de los servicios públicos fundamentales.

Pal voceru de Facienda del PP, el Gobiernu podría asumir en parte estos postulaos, pero paez qu'a Barbón y a la so coalición de Gobiernu compénsa-yos apautar unes cuentes colos populares.

Amás, los populares temen que los presupuestos del Gobiernu pa 2025 n'Asturies “van ser idénticos" a los anteriores colo que "nun van dar respuesta a los problemes de los asturianos” y "van siguir nel “error" yá que nun van sirvir pa reactivar la economía, allixerar la carga burocrática o lliberar recursos pa la inversión granible.