El concursu-esposición de ganáu de Porrúa torna tres la suspensión pola EHE

Los ganaderos apunten a una menor fuercia de la enfermedá nel oriente

Un total de 616 son los positivos que rexistra güei la enfermedá hemorráxica epizoótica na cabaña ganadera anque, eso sí, de menor gravedá que va un añu. Na zona oriental los profesionales señalen que s'amenorgó la so presencia.

Esta, xunto al llobu, señalen, son les principales problemátiques qu'encara agora'l sector. Anque agradecen el compromisu del Principáu de sufragar el costu de la vacunación en 2025, dellos sindicatos critiquen qu'inda nun se cobraron les ayudes, que van llegar a 505 profesionales por daqué más d'un millón d'euros.

La EHE foi precisamente la causante de la suspensión de la última edición de l'Amuesa d'Asturiana del Monte que tornó con 450 reses, 45 ganaderíes y ésitu de públicu.