El prindáu pola violación en Somió ta custodiáu nel HUCA

Foi treslladáu al hospital dempués de resistise al prindamientu

L’home, prindáu como presuntu autor de la violación a una menor Xixón, sigue baxo custodia nel HUCA, onde foi treslladáu dempués de resistise al prindamientu.

Custodiáu permanentemente, el presuntu agresor sexual, un asturianu de 43 años, sigue ingresáu. Enagora nun se-y pudo tomar declaración. L’home mancóse na cara na fuerte griesca que tuvo colos axentes cuando fueron a prendelu, polo qu’amás d’un delitu d’agresión sexual, enfréntase tamién a atentáu escontra l’autoridá.

El prindamientu foi esti domingu nel domiciliu nel que vivía en Xixón, nel barriu de Laviada. Na investigación foi clave l’análisis de los restos d’ADN, que fueron los que llevaron a la so identificación.

L’ataque foi’l 30 d’ochobre nel camín de los Llirios, na parroquia xixonesa de Somió. El presuntu agresor abordó de forma violenta a una moza de 17 años, llevóla a una zona separtada y consumó l’agresión.

Dos selmanes y media dempués, y tres una dura investigación, los axentes algamaben prindalu. Too apunta a qu’agotarán el plazu de les 72 hores enantes de pasalu a disposición xudicial y nun se descarta que, si sigue ingresáu, la comitiva xudicial vaya hasta l’HUCA.