La viabilidá del Mataderu de Xixón vuelve a tar en peligru

La empresa que diba asumir la so compra nun ta dispuesta a asumir los estrozos apaecíos nes instalaciones

La viabilidá del Mataderu de Xixón, anguaño en concursu d’acreedores, vuelve a tar en peligru. La empresa que diba asumir la so compra nun ta dispuesta a asumir los desperfectos apaecíos nes instalaciones. Cífrense en 300.000 euros. El Comité d’empresa denuncia que fueron provocaos por dellos sabotaxes. La Policía Nacional fízose cargu de la investigación.

Les declaraciones feches por unos fechos que tuvieron llugar esti branu apunten nuna mesma dirección. Asina lo aseguren fontes venceyaes a la investigación. Sicasí, entá nun hai pruebes abondes que dexen el prindamientu de nengún de los presuntos saboteadores.

Anguaño, el mataderu funciona baxo la xestión del alministrador concursal. El miércoles quier formalizase la escritura de trespasu al grupu cárnicu ganaderu asturianu. Sicasí, esta empresa nun ta dispuesta a asumir los 300.000 euros que supondría reparar los estrozos.

Los contactos col Ayuntamientu yá entamaron. De nun haber alcuerdu, el mataderu quedaría al borde del pieslle.

Quince persones trabayen anguaño nes instalaciones de Granda.