La empresa ITS suministra prendes técniques pa Defensa

La ropa ta confeccionao cola última tecnoloxía en materiales

La empresa testil asturiana ITS acaba de ganar un concursu pa suministrar prendes a la Unidá Militar d’Emerxencies. Dende va ocho años trabaya pal sector de Defensa, que yá supón cuasi la metá de la so facturación, destaca Montse Reina, responsable de contratación pública d’ITS Safety.

Enantes del día 6 d’avientu, estos traxes de gala llegarán al alumnáu de l’Academia Xeneral del Aire en Murcia. Tamién surten dende 2022 la ropa deportivo de l’Armada, lo qu’usa enagora la Princesa Leonor en Marín.

Pero d’estos talleres salen otros productos testiles pa tolos cuerpos y fuerces de seguridá del Estáu, dende albornoces hasta monos ignífugos pa pilotos. La protección frente al calor estremo ye la especialidá de la ropa diseñao n’ITS, destaca César González, director financieru d’ITS Safety.

El sector defensa yá iguala en facturación al industrial, col qu’entamó la compañía en 2010. La ropa deportivo ye la tercer llinia de negociu d’esta pyme asturiana que cunta con 27 trabayadores.

ITS participó nel unviu urxente de material solicitao pola UME pa los afectaos pola dana

Trabayar pa Defensa tamién supón saber responder a les emerxencies. El 30 d’ochobre pasáu, ITS recibió una llamada de la UME pal abastecimientu darréu de mantes pa los afectaos pola dana.

La testil asturiana unvió 3.500 pares de chancles pa los militares desplegaos na zona nuna llicitación esprés que s’axudicó namás nun día y que se mandó en menos de 48 hores.