Los collecheros busquen blindase frente a la mazana de Centroeuropa

Piden una nueva denomación d'orixe pa la mazana asturiano

Manzana francés, mostu de Centroeuropa y, en medría, variedaes asturianes llantaes en Galicia p’amenorgar costos, ye la competencia a la que nun puen facer frente los collecheros de mazana asturiano pa sidra.

Mesma collecha, mesma finca, mesma variedá de mazana, pero por uno, el veceru pagará hasta 46 céntimos el kilo y por otro ente 6 y 8 céntimos menos. Ye la diferencia ente’l preciu al que se paga la mazana que va pa facer sidra d’Asturies y lo que va pa sidra natural. Neso marcha, en bona midida, la rentabilidá del sector, señala Jorge García, director de Producción Vexetal de Campoastur.

El costu mediu n’Asturies ta afitáu por un estudiu de la Universidá d’Uviéu, que se va actualizando tolos años, a 57 céntimos el kilo pa cubrir costos de producción. Esti añu los llagares lo máximo que tán dispuestos a pagar ye 46 céntimos. Ye dicir, siguimos vendiendo a pérdides, esplica Víctor Manuel Ramos, presidente del Conseyu Regulador de la DOP Sidra d’Asturies.

En dos décades Asturies perdió cuasi un terciu de la so estensión de pumaraes. La baxa rentabilidá desincentiva que se llante. Anima la entrada de mazana de fuera y la salida de collecheros, que llanten variedaes asturianes nes comunidaes vecines esplica José Alonso, collecheru.

Buscando rentabilidá pa tola so producción, y non solo pa lo que va pa sidra con DOP, un grupu de collecheros entamó los trámites pa crear una denomación d’orixe de la mazana asturiano. Preséntenla al sector per primer vegada esta nueche n’Asturies Selmanal, que fadrá una radiografía del sector.