Circulación ensin incidencies y con fluidez na autopista d'El Güerna

Payares recupera'l so tráficu avezáu tres la reapertura de l'AP-66

La circulación na autopista AP-66, principal vía de comunicación ente Asturies y la Meseta, tuvo trescurriendo ensin incidencies y con fluidez, nestes primeres hores d'apertura de la esviadura provisional.

El tráficu circuló pelos 270 metros de bypass de l'Autopista d’El Güerna ensin dificultá. La circulación nun ye mui abondosa, polo que nin el trazáu nin la llende de velocidá provoquen caravana.

Agradezlo quien fai’l trayectu con frecuencia y quien tien entamáu un viaxe pa la Meseta.

La esviadura provisional dexa a los operarios siguir trabayando na zona afectada pol esbarrumbe. Aucalsa nun avanzó entá cuála va ser la solución definitiva, nin los plazos de restauración, anque sí reconoz que van llevar tiempu.

Lo que sí sabemos ye que l'adecuación de la esviadura, que s'executó nun plazu de dos selmanes, traxo complexidá técnica. Abriéronse dos carriles en sen Lleón, y otra en sen Asturies.

Asitiáronse malles metáliques y una barrera dinámica de 100 metros, que ye la más grande, d'estes característiques, que s'asitió n'España. Too ello col envís de protexer a los vehículos de potenciales nuevos argayos.

Cola apertura de l’AP-66, yá en Campumanes, nótase que la gran mayoría de turismos y bona parte de vehículos pesaos opten per El Güerna pa entrar o salir a la Meseta. Les caravanes de los postreros 17 díes desapaecieron.

Pela cueta, pa los negocios del altu del puertu supón perder veceros. La N-630 vuelve asina a la normalidá.