El Conceyu de Xixón va sancionar a Minersa por un sondéu illegal

En Xixón y Siero, Minersa busca fluorita, un mineral mui demandao pol sector armamentísticu

El Conceyu de Xixón va sancionar a una de les empreses más importantes de l'actual minería n'Asturies. Minersa ta faciendo un sondéu nuna parcela onde nun tien permisu. Ye un sondéu illegal.

Ta mui cerca de la ciudá de Xixón, na parroquía de Vega, nuna paraxa próxima a la fonte de Paniceres. El sondéu foi grabáu va unos díes por un equipu de TPA Noticies.

L'equipu de gobiernu muncipal dio orde de paralizalu. La sanción a Minersa va sumase a la que yá recibió l'añu pasáu pola Confederación Hidrográfica del Cantábricu. Fueron 1.300 euros por contaminar el ríu Espasa.

En Xixón y Siero, Minersa busca fluorita, un mineral mui demandao pol sector armamentísticu, nuclear y tecnolóxicu. La denuncia surdió de los vecinos.