Uviéu rexistra'l mayor siguimientu de la fuelga de tresporte y Xixón el menor

CCOO califica como éxitu la xornada de fuelga n'Asturies y nel restu del país

Nel tresporte de viaxeros el siguimientu foi desigual. N’Uviéu, la fuelga de TUA sofitáronla un 40% de la plantiya. En Mieres pela tarde llegóse al 33%, mientres qu’en Xixón namás s’algamó un 16,5%. La fuelga tamién afectó al tresporte interurbanu, a la conectividá col aeropuertu y a les conexones d’Asturies con otres provincies. Nel casu de los viaxes pa Madrid los servicios Supra nun salieron y circularon 6 autobuses en servicios mínimos.

Comisiones Obreres califica como un trunfu’l siguimientu de la xornada de fuelga. Afirmen que n’Asturies había cuasi 3.000 conductores llamaos a sofitala, tanto de mercancíes como de viaxeros y qu’ente’l 50 y el 55% fízolo. Dende’l sindicatu consideren que la rempuesta foi inclusive más importante de lo que pensaben al ser l’únicu sindicatu que yá sofita’l paru. Recuerden que nun piden cuestiones económiques sinón un coeficiente reductor pa poder retirase enantes de los 67 años apunta Manuel García, coordinador del Sector de Carretera de CCOO.

La fuelga sigue esti vienres. Comisiones Obreres espera poder llegar a un alcuerdu enantes del 5 d’avientu y algamar un calendariu de negociaciones qu’evite’l restu de paros convocaos asina como una fuelga indefinida.