Asturies va tener un presupuestu de 6.664 millones en 2025, un 4,9% más

Peláez afirma que los presupuestos van dexar encarar los "grandes retos" d'Asturies  

Los presupuestos del Principáu pa 2025 tienen la so aprobación garantizada. Son los que la comunidá "necesita" porque van movilizar "tolos recursos disponibles" pa encarar los "grandes retos" de la comunidá, como'l sofitu a la mocedá, l'accesu a la vivienda y el refuerzu a l'atención a la salú mental.

Asina lo aseguró esti vienres el voceru del Executivu asturianu y conseyeru de Facienda, Guillermo Peláez, tres l'aprobación por parte del Gobiernu asturianu de les cuentes que van xubir finalmente a 6.664 millones d'euros, un 4,9 por cientu percima del vixente anguaño, les más altes de la hestoria.

Según punxo en valir, el presupuestu va dedicar cuasi 4.400 millones a gastu social y más de 1.000 a inversiones granibles, lo que dexa "caltener" el ritmu de los últimos exercicios y rematar actuaciones yá en marcha.

"Son los meyores presupuestos qu'igüemos", afitó Peláez, nuna rueda de prensa na que destacó l'ampliación de la vía fiscal asturiana cola incorporación de nueves deducciones, como una empobinada a los mozos, d'hasta 2.000 euros, pa los gastos vitales de los menores de 35 años.