Ciencia plantega proyectos particulares venceyaos al espaciu y la recuperación de mines

El presupuestu de la conseyería ascenderá a 449 millones d'euros

La Conseyería de Ciencia, Empresas, Formación y Trabayu quier acometer l’añu qu’entra dellos proyectos particulares colos que se plantega atraer a la industria aeroespacial, cuntar con un centru tecnolóxicu de referencia pa les pymes o recuperar instalaciones de vieyos pozos mineros p’agospiar centros de procesamientos de datos o investigar sobre la habitabilidá de la Lluna.

El presupuestu d’esta conseyería, que l’añu viniente ascenderá a 449 millones d’euros, un 4 por cientu más qu’anguaño, foi detalláu esti llunes pol so titular, Borja Sánchez, qu’insistió en que les cuentes tán orientaes a afitar un texíu productivu más competitivu, basáu na sociedá del conocimientu, que dexe atrayer nueves industries.

Anque la mayor parte del so presupuestu va dirixíu al programa d’universidaes, qu’absorberá 189 millones, y al Serviciu Públicu de Trabayu, que llevará otros 147, los programes d’innovación y desendolcu tecnolóxicu algamarán los 65 millones, un 22 por cientu más qu’esti añu.

Según el conseyeru, l’oxetivu pasa por abrir la economía a sectores tecnolóxicos y innovadores al traviés d’iniciatives de collaboración público-privada, polos d’innovación y otros programes de tresferencia de conocimientu y especialización que fagan d’Asturies un referente.