Asturies ye l'autonomía con más incidencia d'enfermedá renal crónica

El xefe de nefroloxía del HUCA pide a Salú qu'afite un cribáu renal

Asturies ye, per primer vegada, l’autonomía con más incidencia d’enfermedá renal crónica. Son 241 casos por millón de habitantes, 90 puntos penriba de la media nacional que s’asitia en 151 casos.

A un 15% de la población nun-y funcionen bien los reñones, eso son 150.000 asturianos y d’ellos 1.500 tán nuna fase avanzada de la enfermedá. Esto significa qu’o recibieron tresplante, nesti casu hai 825 asturianos, o tán en diálisis, onde tán 675 persones.

El xefe de nefroloxía del HUCA, Emilio Sánchez, pide a Salú qu’afite un cribáu d’esta enfermedá.

Ye una epidemia silenciosa que se podría contener con un cribáu a mayores de 50 años. El so costu sedría baxu, 90 céntimos d’euru por persona, lo que cuesta l’analítica.

A la fase avanzada, na que faen falta’l tresplante o la diálisis, cada vegada lleguen más asturianos. Los nuevos casos medraron un 25% en 2023. En parte porque se diagnostica más, con especialistes en toles árees sanitaries pero hai otros factores.

Pa tener unos reñones saludables hai que llevar una dieta saludable, beber agua anque non n’esceso, un llitru o llitru y mediu caldía basta, y nun abusar de los antinflamatorios.