Denunciáu por homicidiu imprudente un camioneru pola muerte d'una muyer na AS-II

L'accidente foi "nun tramu rectu y de bona visibilidá, con un perfil ascendente"

La Guardia Civil denunció énte’l xulgáu por un delitu d’homicidiu imprudente al camioneru que causó la muerte d’otra conductora, de 44 años, na carretera AS-II, en Xixón, el 14 d’ochobre pasáu, informó esti miércoles la Comandancia d’Asturies.

El siniestru vial tuvo llugar sobre les 13:00, cuando’l camión articuláu que conducía l’agora investigáu chocó violentamente escontra’l turismu de la muyer, que taba paráu na carril derecha de les tres existentes.

La conductora y única ocupante del turismu tuvo que ser escarcelada y evacuada nuna UVI al Hospital Universitariu Central d’Asturies (HUCA), onde morrió a les poques hores énte la gravedá de les mancadures.

Según los investigadores, el choque ente’l camión y el turismu, que taba paráu cola conductora dientro, foi "nun tramu rectu y de bona visibilidá, con un perfil ascendente".