La violencia escontra los menores crez más del 1.600% en 30 años

La prostitución infantil torna por cuenta de les redes sociales

Aumenten de forma alarmante los casos de violencia ente menores. La Fundación Anar afita qu'en 30 años crecieron más del 1.600%.

Tamién xuben los problemes de salú mental atendíos pel teléfonu d'esta ONG, fáenlo nun 643%. Dende 1994 ayudaron a más de 227.000 menores y recibieron más de 6,5 millones de llamaes. El pasáu añu n'Asturies ayudaron a 335 adolescentes o menores y recibieron más de 5.000 llamaes o chats.

Acaben d’asoleyar un estudiu que da a conocer cómo cambiaron les problemátiques de la infancia y l'adolescencia en 30 años. Cada añu multiplicóse por 10 el númberu de casos atendíos.

Amás, avisen de qu'un problema que daben por desaniciáu en 2010, la prostitución infantil, tornó al nuesu país por cuenta de les redes sociales. Aseguren que les tecnoloxíes convirtiéronse nel caldu de cultivu pa potenciar problemes y pa que fenómenos que se daben prácticamente por escastaos vuelvan tener presencia.

La bona noticia ye que la concienciación social aumentó, yá que, aseguren, son los mesmos usuarios de pornografía los que denuncien la presencia de menores.

Con too y con eso, crecen los problemes de salú mental, l'acosu y les agresiones sexuales. Por eso afiten que la educación ye la meyor opción pa pone-y frenu.

Y nesa llinia insisten nel papel de la familia. Dende la Fundación Anar, afiten la importancia de que padres y fíos compartan tiempu de calidá, lo que va redundar na so formación y va ayudar a meyorar la so autoestima.