Asturies sedrá la primer comunidá autónoma en financiar la vacunación voluntaria de la cabaña ganadera

El presupuestu de la conseyería medrará un 3,5% al respective del vixente anguaño y algamará en 2025 los 263 millones d'euros

La Conseyería de Mediu Rural y Política Agraria aprovechará’l presupuestu de 2025 pa convertir Asturies na primer comunidá autónoma que va financiar la vacunación voluntaria d’enfermedaes de declaración obligatoria de la cabaña ganadera.

Con esti fin reservóse una partida de 11,2 millones d’euros pa reforzar la prevención y cuidáu de la sanidá animal, según dixo’l conseyeru de Mediu Rural y Política Agraria, Marcelino Marcos, nuna rueda de prensa na qu’esgranó los presupuestos previstos pal añu viniente nel so departamentu.

El presupuestu de la conseyería medrará un 3,5 por cientu al respective del vixente anguaño y algamará en 2025 los 263 millones d’euros, de los que 98,8 millones, el 37 por cientu del total son fondos de la Política Agraria Común pal pagu d’ayudes a ganaderos y agricultores.