La costa asturiana, n'avisu naranxa por vientu y mala mar

La flota pesquera tará amarrada hasta metá de la selmana

Tola costa asturiana, como la del restu del Cantábricu ta esti sábadu n’avisu naranxa por mala mar, con foles que puen algamar los siete metros na costa occidental, y los seis na oriental, asina como por fuerte vientu del noroeste d’ente 50 y 61 kilómetros per hora.

Nel cordal y Los Picos d’Europa tamién s’activó l’avisu mariellu por ñeve que pue llegar a acumular los diez centímetros o más n’altures penriba de los 1.000 ó 1.200 metros.

L’Axencia Estatal de Meteoroloxía (Aemet) caltién güei n’avisu coloráu por ñeve fuerte’l Pirinéu oscense y navarru, y El Val d’Arán (Lleida), y n’avisu naranxa a otres siete comunidaes autónomes por vientu o mala mar: Asturies, Baleares Cantabria, Castiella y Lleón, Galicia, País Vascu y Comunidá Valenciana.