Avisu mariellu por fuertes foles na mariña asturiana

La primer ivernada d'avientu dexa foles d'hasta cinco metros en Xixón y en Castrillón

La mariña asturiana sigue a esta hora n'avisu por fenómenos costeros. Tres dos díes n'avisu naranxa, güei l'alerta baxó a nivel mariellu.

Mar combinada con foles d'hasta cinco metros visibles esta mañana en puntos como la sablera de San Llorienzo.

Otra xornada iverniza en Xixón na qu’a les foles, sumáronse dellos bastiaos y raches de vientu que, sicasí, nun algamen los más de 50 kilómetros rexistraos tol fin de semana.

La primer ivernada tamién dexó fuertes vientos na mariña de Castrillón.

L'altor de les foles va dir menguando nes próximes hores. Aemet desactiva los avisos na mariña a partir de mañana.

La parte bona de la ivernada siempres tien que ver coles imáxenes que dexa, colo espectacular que s'amuesa la natura estos díes. Nel oriente d'Asturies güei munchos turistes madrugaron pa ver la fuerza del mar na redolada de los Bufones de Pría.