El sector sidreru apuesta pola profesionalización y mecanización de les pumaraes

El consumu de sidra esplumoso, mui enraigonáu en Méxicu, Arxentina y Chile

La profesionalización y mecanización de les pumaraes, la investigación p'ameyorar el rendimientu de la mazana, l'escanciáu nes sidreríes y la ellaboración d'una estratexa común pa crecer nos mercaos nacionales y internacionales, son clave pa rellanzar tou un sector que ve na declaración de Patrimoniu de la Humanidá de la cultura sidrera asturiana una oportunidá.

Na tierra, la rentabilidá pasa pela profesionalización y mecanización de la producción de mazana. Pa ello, necesítense más pumaraes y mayores. Dalgunos llagareros opten por llantar hectárees de pumares colos qu'abastecese.

La investigación ye clave. Non solo pa meyorar les veceríes sinón tamién les variedaes, que se puea ellaborar sidra diríemos d'autor, señala Verísimo Busto, xerente de Sidra Mayador.

L'escanciáu ye la seña d'identidá de la cultura sidrera y polo tanto propia de les sidreríes. Dalgunes fixeron del so dominiu un oficiu, que ye amás una atracción turística, destaca José Antonio Norniella, xerente de Sidra M. Norniella.

Eso en casa, fuera'l sector necesita xunise so una estratexa común cola qu'abanderar la nuesa bebida kilómetru cero y tolo que trai p'asitiase y crecer en mercaos nacionales y internacionales, señala María Cardín, directora comercial y de marketing d'El Gaitero.

El sector nun tien un plan integral pa que dea frutu la declaración de Patrimoniu Inmaterial de la Humanidá.

El consumu de sidra esplumoso, mui enraigonáu en Méxicu, Arxentina y Chile

En Méxicu, Arxentina o Chile, beber sidra esplumoso nestes feches ye una tradición mui enraigonada y bien estendida. El so consumu empezó cola emigración asturiana, señala Luis Benito García, director de la Cátedra de la sidra de la Universidá d'Uviéu.

La sidra natural llegaba avinagrao, asina que, buscáronse fórmules como amesta-y gas y azucre.

Nació una potente industria en dambos continentes. N'especial, 'El Gaitero', una marca que fixo hestoria, que ye patrimoniu, que se conoz en tol mundu.

Mientres n'España esta sidra significa Navidá o Añu Nuevu, n'América, amás, conviértese nel gordón umbilical de los asturianos col so orixe, señala María Cardín, directora comercial y de marketing del Grupu El Gaitero.

Cada añu crez la esportación. Non solo n'América. Amás de n’Europa, abriéronse mercaos n'Asia o n'África.