El PP de Pravia presentará una moción pa que s'arreglen los problemes de la trayida del agua potable

L'alcalde defende que nengún informe pon en dulda la bona calidá del agua

El PP de Pravia presentará una moción pa que s’arreglen los problemes de la trayida del agua potable. Consideren qu’hai deficiencies nes instalaciones, con tuberíes en mal estáu, errores na cloración o incumplimientos nos análisis obligatorios.

Unes deficiencies que, aseguren, apaecen nun informe de la Conseyería de Salú y que taríen tres el biltu de gastroenteritis qu’hubo nel conceyu n’ochobre. D’ehí que pidan la dimisión del alcalde.

Per parte de so, l’alcalde defende que nengún informe pon en dulda la bona calidá del agua y que nun hai nengún datu qu’afite que’l biltu de gastroenteritis foi d’orixe bacterianu. Considera, amás, qu’estos ataques son porque’l PP quier que se privatice’l serviciu.

Sicasí, entiende qu’esti tipu d’afirmaciones por parte de la oposición namás sirven pa estrozar ún de los bienes públicos con más valir pal consistoriu como ye l’agua.