El cai d'Avilés amplía la so rede ferroviaria con una inversión de 2,8 millones

El nuevu trazáu xube a 6.120 metros la llargura total de víes

L’Autoridá Portuaria d’Avilés destinó 2,8 millones d’euros pa l’ampliación en 1,2 kilómetros de la so rede interior de ferrocarril y conectala cola vía yá existente pa dexar la circulación de trenes en doble sen, informó esti martes el presidente de la entidá, Santiago Rodríguez Vega, nuna visita a les obres.

El nuevu trazáu xube a 6.120 metros la llargura total de víes, tanto d’anchu ibéricu como d’anchu métricu.

En 2023, 186.296 tonelaes de mercancíes usaron el ferrocarril pa la so entrada o salida de los cais avilesinos.

Según destacó Rodríguez Vega, l’actuación, financiada dafechu pol Mecanismu de Recuperación y Resiliencia (MRR) de la Xunión Europea, dexará al cai "tener una posición meyor de cara al futuru y mayor capacidá p’atender nuevos tráficos".

Les nueves redes ferroviaries darán serviciu al cai de San Pedro Navarro, na maxe derecha de La Ría d’Avilés.

La primera d’estes víes tien una llargura de 616 metros y la segunda de 661 metros con un usu d’apartaderu y como vía d’escape pa llocomotora.

Rodríguez Vega visitó les obres executaes, remataes recién, xunto al director de l’Autoridá Portuaria, Ramón Muñoz-Calero García, ente otros.

El presidente dixo que, pa un cai, cuntar con una bona conectividá ferroviaria y viaria ye fundamental.

“Nun dexamos de ser un ñudu lloxísticu d’intercambéu de mercancíes y, poro, déxanos tener una posición meyor de cara al futuru y mayor capacidá p’atender unos tráficos qu’enagora nun tenemos, pero que sí podemos llegar a tener”, esplicó Rodríguez Vega.