La XE algama un alcuerdu sobre la pesca de 2025 nel Atlánticu y el Mediterraneu

Los pescadores asturianos caltienen la so cuota de merluza y ganen cuota de pixín y gallu

La flota de costa y baxura algama caltener la so situación dempués del alcuerdu de los ministros de pesca de la XE. Los pescadores asturianos caltendrán el total almisible de captures (TAC) de merluza, mientres que ganen en pixín (+17%) y gallu (+23%).

L’alcuerdu algamóse dempués de dos díes de xunta en Bruxeles y dexará, diz la XE, caltener les poblaciones de pexe en niveles sostenibles y protexer l’entornu marín, al empar que se considera tamién la viabilidá del sector.

El centru de la negociación taba puestu nel Mediterraneu.

Nel Mediterraneu occidental, los ministros acordaron amenorgar l’esfuerzu pesqueru de los arrastreros nun 66% n’agua d’España y Francia y nun 38% n’agua de Francia y Italia.

Los pescadores, eso sí, podrán faenar más díes a cambéu de que se comprometan cola selección d’especies y tamaños afayadizos, col pieslle de pesca d’árees de mar y col usu d’instrumentos de pesca "anovadores".