La falta d'actividá nel mataderu trestorna'l día a día de les carniceríes xixoneses

Los tiempos de repartu de la carne medraron

El fin de l’actividá nel mataderu supunxo una medría nos tiempos del repartu de la carne y nel preciu de los portes del ganáu. Ye la consecuencia, apunten les carniceríes xixoneses, de pasar a depender nos más de los casos del mataderu de Noreña.

Nun ta influyendo nel preciu final de la carne en Xixón, pero la falta d’actividá nel mataderu ta suponiendo trestornos nel día a día de les carniceríes xixoneses. Los tiempos de repartu de la carne medraron. Pa los ganaderos xixoneses supunxo tamién una medría de los portes, esplica Rosi Díaz, carnicera xixonesa.

El sector llamenta la lenta degradación de los servicios prestaos pol mataderu hasta llegar al so pieslle.

Mientres, sigue la investigación sobre los presuntos sabotaxes qu’echaron p’atrás la pretensión del Grupu Cárnicu Ganaderu Asturianu de xestionar el mataderu.

El casu ta yá xudicializáu. La Policía Nacional confirma que yá dio treslláu al xulgáu qu’instruye la causa del conxuntu de les investigaciones feches.