UXT y CCOO señalen que'l presupuestu de 2025 va na bona dirección y FADE cuestiónalu

La FACC reclama que les tresferencies a los ayuntamientos tengan que'abonase nos primeros meses del añu

UXT y CCOO consideren que los presupuestos del Principáu pa 2025, que medrarán un 5% y superarán los 6.664 millones d’euros, van na bona dirección y cumplen colos oxetivos de protección social y inversión productiva, anque pa la patronal asturiana les cuentes caltienen les debilidaes d’años anteriores y siguen ensin acompasar la so medría a la del PIB.

Representantes d’estes tres organizaciones comparecieron esti miércoles énte la Comisión de Facienda de la Xunta Xeneral del Principáu pa pronunciase sobre les cuentes feches pol Gobiernu d’Adrián Barbón, que tien asegurada la so aprobación el día 27 viniente.

La presidenta de la Federación Asturiana d’Empresarios (FADE), María Calvo, alvirtió qu’esti presupuestu "caltién les virtús y debilidaes" de los anteriores, y que tendría qu’acompasase la medría de les cuentes públiques, que lo ficieron a un ritmu del 6,5 por cientu de media nos últimos años, a la del productu interior brutu (PIB), que lo fizo prácticamente a la metá.