Valgrande-Payares y Fontes d'Iviernu abrirán mañana la temporada d'esquí

Caltiénense los precios de la pasada temporada nes dos estaciones

Les estaciones d’esquí de Valgrande-Payares, en L.lena, y Fontes d’Iviernu, n’Ayer, trabayen p’abrir mañana, xueves, al públicu, si dexen les condiciones meteorolóxiques.

Nel casu de Fontes d’Iviernu, quieren abrise cinco pistes (tres verdes, una azul y una colorada) nes zones media y baxa de la estación, con un percorríu total de 3,5 kilómetros y espesores de ñeve de trenta centímetros.

Los remontes que se pondrán en marcha sedrán el telesiella Llana’l Fitu, el telesquí Tonéu y la cinta, informó’l Gobiernu asturianu.

Sicasí, los trabayos d’acondicionamientu tán en marcha p’ampliar la ufierta esquiable de manera progresiva nos díes vinientes, teniendo siempres en cuenta la meteoroloxía.

Na Estación Ivernal y de Monte Valgrande-Payares, abrirá toles pistes disponibles, con espesores de 60 a 75 centímetros de ñeve polvo.

Los remontes abiertos inxerten la telecabina de Cuitunigru, los telesielles de Brañil.lín y Valle del Sol, el telesquí de Fontes de La Reina y la cinta capotada inferior.

Les previsiones meteorolóxiquen dan anuncia cielu con ñubes y claros, temperatura baxa y vientu moderao del sur nes dos estaciones.

Anguaño, fai falta l’usu de cadenes p’acceder a Fontes d’Iviernu, polo que se recomienda consultar l’estáu de les carreteres na web del 112 Asturies y siguir les actualizaciones nes páxines web oficiales y les redes sociales de les dos estaciones.

El forfait d’un día costará 29 euros en temporada alta y 23 en baxa. Caltiénse’l de cuatro díes cuatro estaciones y vuelven los populares díes del esquiador, con precios amenorgaos en temporada baxa.

Los miércoles en Fontes d’Iviernu y los vienres en Valgrande-Payares, el forfait tendrá un preciu especial de 15 y 16 euros, respectivamente.

La campaña allargaráse hasta’l 20 d’abril, anque siempres dependiendo de les condiciones meteorolóxiques.