Gisèle Pelicot va dar nome al nuevu Centru de Crisis pa Víctimes d'Agresiones Sexuales

"N'Asturies vamos mirar de frente esta vergoña social porque volver la cara fadríanos cómplices" apunta Adrián Barbón

El nuevu Centru de Crisis pa Víctimes d'Agresiones Sexuales que'l Gobiernu d'Asturies inauguró esti xueves n'Uviéu va llevar el nome de Gisèle Pelicot, un equipamientu que va ser "referente" y un “exemplu" a nivel nacional, según aseguró la ministra d'Igualdá, Ana Redondo.

Esti recursu, qu'abrió les sos puertes nel centru de la capital d'Asturies en payares de 2020, treslládase agora a un edificiu completu nel barriu de La Corredoria, con una superficie construyida de 1.328 metros cuadraos y tres una inversión de 1,4 millones, pa responder a la creciente demanda d'atención especializada.

Desque empecipió la so andadura dio asistencia a 1.176 persones, de les que 801 fueron víctimes de violencia y, el restu, familiares o persones allegaes.