El PSOE necesita 23 diputaos p'aprobar dos enmiendes pa correxir l'error sobro l'impuestu de sucesiones

Les miraes tán puestes en Convocatoria y Covadonga Tomé

El Partido Socialista nun llogra incluyir nel dictame del proyectu de presupuestos les sos dos enmiendes pa correxir l'error detectáu nes bonificaciones del impuestu de sucesiones pa los familiares de cuartu grau. El so sociu de gobiernu, Convocatoria, absteníase na votación, y tamién lo faía'l grupu mistu. A la escontra votaben PP y Vox.

Al nun incluyilu nel dictame, estes enmiendes van tener que ser votaes mañana nel plenu. En total, van aldericase 175 enmiendes parciales. Les dos del Partido Socialista, otra del PSOE con Convocatoria, 23 del diputáu de Foro y 149 del Partido Popular que ye'l grupu que más enmiendes propón. Les 24 presentaes por PSOE, Convocatoria y Covadonga Tomé yá fueron incorporaes al dictame.

El grupu socialista fai númberos. Necesita 23 diputaos pa sacar alantre nel plenu eses dos enmiendes y pel momentu, namás Foro anunció que les sofitará. Eso sí, failo cuestionando l'error y l'actitú del conseyeru.

Toles miraes tán agora en Convocatoria, sociu de gobiernu, y en Covadonga Tomé que s'abstuvo na votación, torgando la incorporación de les enmiendes al dictame y dexando l'alderique pa esti vienres.

El Partido Socialista defende que les sos enmiendes quieren correxir l'error detectáu en sucesiones pa que’l 99% de la bonificación tamién afecte a los familiares de cuartu grau. Partido Popular y Vox falen de chambonada.

Convocatoria y Covadonga Tomé sí van sofitar el dictame final de les cuentes, nel que s'incluyeron les 24 enmiendes que presentaben conxuntamente. Foro, va decidir esti vienres el sen del so votu a esi dictame.