Álvarez-Cascos niega lucrase con Foro y diz que los sos gastos taben xustificaos

La Fiscalía pide pal ex-presidente de Foro tres años de cárcel

L’ex-vicepresidente del Gobierno y ex-presidente del Principáu, Francisco Álvarez-Cascos, aseguró esti martes que nunca se lucró nin tuvo control dalgún sobre les cuentes de Foro Asturies y que, a nun ser dos o tres errores alministrativos, tolos pagos que cargó a les cuentes del partíu taben xustificaos pol so cargu y cubiertos polos gastos de representación y llibre disposición.

"Nun tuvi responsabilidaes económiques, nun m’encargué de la xestión económica, nun tuvi tarxetes de creitu, nun controlé enxamás los gastos y había una estructura profesional de persones a les que yo nun conocía pa llevar la contabilidá, la fiscalización y les auditoríes añales, daqué que se fizo impecablemente", aseguró al testificar énte’l tribunal de l’Audiencia Provincial d’Uviéu que lu xulga por un presuntu delitu d’apropiación indebida.

Álvarez-Cascos enfréntase a una pena de tres años y mediu de cárcel al tar acusáu de cargar gastos propios a Foro Asturies, el partíu creáu al rodiu de la so figura en 2011 dempués de la so marcha del PP y col qu’accedió a la presidencia del Principáu d’Asturies en xunetu d’esi mesmu añu.