Francisco Álvarez-Cascos arremete escontra Foro, pola pérdida de votos nos últimos años

Mañana siguirá l'interrogatoriu a Francisco Álvarez-Cascos

Mañana siguirá l’interrogatoriu a Francisco Álvarez-Cascos nel xuiciu escontra él por presunta apropiación indebida de fondos del partíu qu’ayudó a impulsar, Foro Asturies.

Na primer sesión, el que fuere presidente del Principáu faló del nacimientu de Foro y nun duldó n’arremeter escontra’l so antiguu partíu, pola pérdida de votos rexistrada nos últimos años.

Álvarez-Cascos entamó la so declaración faciendo un repasu a la so vida política, sobre manera, a la so vuelta a la mesma en 2010 dempués de qu’un grupu d’afiliaos del Partido Popular, baxo’l nome "pidimos la palabra" fuere, dixo, a buscalu.

Por esi motivu, declaró, diose de baxa del Partido Popular el 1 de xineru de 2011 y al poco nacía Foro Asturies.

Nel so interrogatoriu, Álvarez-Cascos tamién fizo referencia a la so etapa como presidente del Principáu y xustificaba los gastos n’A Coruña, nel pidimientu d’ayuda al Partido Popular de Galicia pa desbloquiar la situación política que vivía.

El que fuere líder de Foro tamién reconocía énte’l tribunal los fracasos electorales nes xenerales y nun duldaba en llanzar dardos escontra dalgunos de los sos antiguos collaboradores nin en cuestionar a l’actual dirección del partíu que lu sentó nel bancu.

Esti xueves Álvarez-Cascos volverá a declarar pa responder a les entrugues de l’acusación particular y de la so defensa.