La Cámara de Comerciu y l'Universidá roblen un alcuerdu sobre la llingua de signos

Paniceres: L'alcuerdu dexa "apurrir un valor amestáu al texíu empresarial asturianu"

La Cámara de Comerciu d'Uviéu y l'Equipu d'Investigación "Mis Manos Hablan" de la Universidá d'Uviéu roblaron esti xueves un alcuerdu de collaboración pa promover la tresferencia de conocencia y sofitar investigaciones rellacionaes cola Llingua de Signos Española (LSE).

Esti alcuerdu busca fomentar la inclusión social, desaniciar barreres comunicatives y llevar les resultancies d'estes investigaciones al texíu empresarial, educativu y social asturianu.

Por aciu d’esti conveniu, la Cámara va facilitar l'espardimientu de les resultancies de les investigaciones del equipu "Mis Manos Hablan". Dambes entidaes van collaborar nel espardimientu de materiales educativos y van trabayar na busca de financiamientu pa la divulgación de les resultancies y la formación del personal venceyáu a estes iniciatives.

El presidente de la Cámara de Comerciu d'Uviéu, Carlos Paniceres, destacó qu'esti alcuerdu dexa "apurrir un valor amestáu al texíu empresarial asturianu".

Pela so parte, el director del departamentu de Ciencies de la Educación de la Universidá d'Uviéu, Alejandro Rodríguez Martín, afirmó que l'alcuerdu "refuerza" el compromisu cola inclusión social y "amplifica l'impactu" de les investigaciones de "Mis Manos Hablan".