Diálisis asistida pa pacientes con insuficiencia renal grave nos centros de mayores

Asturies ye la primer comunidá autónoma n'allugar el serviciu

Asturies ye la primer comunidá autónoma qu'alluga la diálisis peritonial asistida pa pacientes con insuficiencia renal grave nos centros residenciales de persones mayores. L’Adaro, en Llangréu, foi'l pioneru. Les residencies del ERA de Santa Teresa, n'Uviéu, y la Mista en Xixón, son los primeros centros públicos del país qu'ufierten esta prestación.

Cosme Vallina Muñiz ye célebre ente los 140 residentes del Adaro. El so chiringu de les manualidades de terapia ocupacional nun tien igual. Esta ye la so casa dende va dos años y mediu, equí echáron-y un gabitu cola diálisis peritonial cuando los sos reñones dixeron basta.

Nun se fixo a la máquina, la cicladora, que sustituyía la so función renal pela nueche, y dende va unos meses nun-y queda otra que dir a hemodiálisis.

Nos dos últimos años, la enfermería d'esti centru asistió a seis residentes en diálisis domiciliaria. De los 51 usuarios actuales, solo la paciente de la 212 necesítala. Los profesionales de Nefroloxía del HUCA formen al personal sanitario, pacientes y familiares, esplica Paula Fernández, supervisora d'Enfermería de la Fundación Sanatoriu Adaro.

Los espertos de Nefroloxía encamienten esti tratamientu pa pacientes con insuficiencia renal, d'edá avanzada y múltiples patoloxíes, señala Emilio Sánchez, presidente de la Sociedá Española de Nefroloxía.

Cuasi un centenar d'asturianos dialícense nos sos llares, agora seya cual seya.