Nel aire les práctiques de cientos d'estudiantes de primeru de FP por falta d'empreses

N'Asturies hai 7.500 alumnos matriculaos en primeru de Formación Profesional

Concentración d'estudiantes de primeru de Formación Profesional. Reclamen les práctiques n'empreses a les que tienen derechu según la nueva Llei de FP.

Los manifestantes son alumnos del IES Isla de la Deva, de Castrillón, y temen quedar ensin esa formación que tendría d'empezar en febreru pero son munchos más, cientos, lo que tán na so mesma situación. Faen falten más empreses.

TPA Noticies entra nel Centru Integráu de Formación Profesional d'Avilés, el centru de formación profesional más grande d'Asturies, el segundu d'España. Equí estudien más de 1.700 alumnos n'ocho rames de la conocencia.

Estos díes nun dan a bastu, tol equipu de docentes ta volcáu n'atopar empresa pa los alumnos de primeru, en cumplimientu de la nueva Llei de FP, esplica Celso Meana, profesor del ciclu formativu de sistemes de telecomunicaciones y informática.

Equí, ensin cuntar a los alumnos d'enseñanza virtual, son 450 los estudiantes que tienen que faer les 120 hores o 15 díes de formación obligatorios por llei. Anguaño, el 30% d'ellos ta ensin destín, esplica Susana Fonseca, directora del Centru Integráu de Formación Profesional d'Avilés.

Dende'l Centru Integráu de Formación Profesional d'Avilés faen un llamamientu a les empreses que collaboren.

Anguaño n'Asturies hai 7.500 alumnos matriculaos en primeru de Formación Profesional.

La patronal ve una oportunidá nel nuevu modelu de FP pero reclamen incentivos económicos p’ayudar a les empreses a sufragar los costos de formar trabayadores.