El programa de vivienda 'Alquilámoste' va entamar nel segundu semestre de 2025

Un programa con garantíes pa los renteros

El nuevu programa 'Alquilámoste' que quier sacar al mercáu viviendes privaes vacíes pa destinales al arriendu algamadizu por aciu d’incentivos fiscales y garantíes de cobru de la renta y ensin dañu pa la propiedá va entamar nel segundu semestre d'anguaño.

Asina lo avanzaron esti xueves el conseyeru d'Ordenación de Territoriu, Urbanismu, Vivienda y Derechos Ciudadanos, Ovidio Zapico, y el director xeneral de Vivienda, Daniel Sánchez, nuna rueda de prensa na que comentaron que nesti primer semestre va aprobase'l decretu que va regular esta midida que cunta con un presupuestu inicial d'un millón d'euros.

Zapico destacó qu'esti programa, que va dexar l'accesu a una vivienda “digna y afayadiza", xenera un gran consensu y nun traxo "nenguna crítica política nin de los axentes sociales".