L'aplicación MiAstursalud algama los 143.000 usuarios, un 67,2% más que va un añu

Crearáse una canal de mensaxería pa la comunicación ente pacientes y profesionales

L’aplicación MiAstursalud, que facilita la comunicación virtual de la ciudadanía colos servicios sanitarios de manera personalizada y segura, algamó los 143.020 usuarios al pieslle de 2024, lo que representa una medría del 67,2% en comparanza col añu anterior.

Amás, el númberu de consultes feches al traviés d’esta ferramienta cuasi se cuadruplicó nel mesmu periodu, al pasar de les 558.825 de 2023 a les 2.117.791 del exerciciu pasáu.

El Serviciu de Salú del Principáu (Sespa) llanzó MiAstursalud n’avientu de 2022 y, dende entós, les prestaciones de l’aplicación fueron medrando, informó l’Executivu asturianu.

De mano, namás se podíen facer xestiones comunes, como la consulta de datos alministrativos, la tramitación de cites n’atención primaria y hospitalaria o la descarga de la fueya de tratamientos prescriptos al traviés de receta electrónica pa presentala na farmacia, ente otres.

A lo llargo del últimu añu reforzáronse los sos servicios, de manera qu’agora ye posible consultar y descargar informes clínicos d’alta hospitalaria, urxencies, consultes esternes, cuidaos d’enfermería y pruebes d’imaxe o informes de llaboratoriu de la rede sanitaria pública.

Otres funciones inxertes son la consulta y descarga de pautes de tratamientos pa pacientes con anticoagulantes orales y l’accesu a información sobre alerxes, vacunes alministraes y refugaes, episodios rexistraos n’atención hospitalaria.

Igualmente, pue consultase la rede de centros del Sespa, con posibilidá de xeolocalización.

Per parte de so, el portal MiAstursalud Profesional, que se punxo en marcha bien llueu, ye un espaciu que dexa la interacción ente profesionales y ciudadanía y facilita los trámites telemáticos.

Nesta primer fase, les persones usuaries puen dirixise a les unidaes alministratives d’atención primaria y hospitalaria pa efectuar trámites como l’anovación de la receta electrónica, el cambéu de domiciliu y/o teléfonu, el cambéu de médicu d’atención primaria, el cambéu o anulación de cites d’atención hospitalaria, y la solicitú de xustificantes d’ingresu hospitalariu o d’asistencia a cites en consultorios y centros de salú.

Próximamente, el personal sanitario podrá facer el seguimientu personalizáu de los sos pacientes.

L’aplicación dexará a los facultativos unviar formularios y afitar plazos pa la so cumplimentación, facilitando’l siguimientu del estáu de salú de cada persona.

Amás, crearáse una canal de mensaxería pa la comunicación ente pacientes y profesionales.